Elke onskuldige woord….

Almal wie my ken, weet teen die tyd dat ek ‘n sameswering in omtrent alles sien. So het ons onlangs op ‘n uitstappie gegaan en kuier kuier van Komatiepoort af ons pad huis toe gekry. Op ‘n kol moes die uwe toe die roep van die natuur gehoorsaam. Ons was op die tydstip al op die derde liter bottel water.

So stop Homer toe by ‘n vultstasie sodat ek aan Moeder Natuur my gehoorsaamheid kan betuig. Ek is vinnig die dames badkamer in. Daar staan twee dames toe klip hard en gesels. Nou kyk, hulle het ook net Moeder Natuur se roepstem gehoorsaam. Dis maar in hulle aard om hard te praat. Elk geval, van die gebabbel, verstaan ek mos toe net die Ingelse woorde. Wat ek gehoor het, was “Siekrat weppon, 7 May, Elektjan. mewnisipal strike (toe staan my hare regop)spesjil wout, invalied en old eitch.” Vir my was dit heeltemal genoeg.

Sê nou net my sameswerings alarm het nie verniet geskree nie? Sê nou net wat ek gehoor het was wel dat die anc ‘n wen resep gekry het om die verkiesing mee te wen? Want sien al het die een dame ‘n rooi baret gedra met ‘n groot bruin baadjie wat enige embleme aan haar boklere verberg het en die ander ene net die vultstasie se uniform, het hulle heel gewigtig geklink. Daar was niks skertsend aan hulle stemtone nie.

Terug in die Fordjie, sê ek vir Homer “Die ANC het ‘n geheime wapen om die verkiesing mee te wen.” Hy het na my gekyk, gelag en gesê: “So, hoe gaan hulle dit doen?” Toe het ek hom vertel: “Op 7 Mei, gaan hulle die verkiesing ontwrig met munisipale betogings. Dink net, meeste stem lokale is by die een of ander munisipale gebou. Sal jy te midde van ‘n staking gaan parkeer, en tussen die singende, dreigende, rommelstrooiende gepeupel deur loop om te gaan stem?” Hy het steeds na my gekyk, maar nie meer gelag nie en gesê: “Nie vir ‘n vy nie. Maar as daar betogings gaan wees, gaan hulle ook nie stemme kry nie.” Ek het gesê: “Hulle gaan die verkiesing wen met die spesiale stemme wat hulle van die Suid Afrikaanse emmigrante, die gestremdes en oues van dae by hulle huise geneem, gaan kry.”

Hy is altyd baie skepties oor al my Sameswerings teorieë. Maar moes toegee: “Wragtig, dit kan werk.”

Gedagte van die dag: 😆