Posts filed under ‘Bitch en Moan’

Sonde soek.

Ek het al gesê dat my nuwe ouma so skielik oorlede is.  Wel, sy het ‘n vriendin/kerksuster/(wit) kind se kleinkind opgepas terwyl die kind se ouma oorsee is en haar (kind) se ouers by die werk.  Toe het ouma Mavis se dogter die kind versorg.  Of dan, opgepas.  Toe kon ek sien sy begin moeg vir die kind word.  My ondervinding met die kind was dat sy nie sosiaal is nie.  Vra haar ‘n vraag en sy het kop onderstebo die hasepad gekies en met die hond buite gaan speel.

Toe besluit “my tannie” sy moet hospitaal toe gaan vir haar oë en sy kan nie meer na die kind kyk nie.  Ai, sonde.  Ek sê toe vir Homer ek wonder of ek nie moet aanbied om na die kind te kyk nie.  Maar aangesien hulle nog tyd het om tussen hulle vriende te soek vir dagsorg vir die kind, doen ek niks meer as die moontlikheid aan Homer te noem nie.  Goeie genade! Toe ek vir my kom kry, het Homer aangebied om na die kind te kyk. Wel!  Natuurlik beteken dit EK moet kyk, Sy is nie stout nie.  Maar genade my!  Juffrou, uit ‘n tipies Afrikaanse gesin, het haarself voor die tv geleer Engels praat.  Nou weier sy om Afrikaans met enige iemand anders as haar ouers te praat.  Die Engels is maar tv Engels en kom deur in ‘n Engelse skool, maar die Engels is nie perfek nie. Die R’e is so Afrikaans en gutteraal soos kan kom.

Niemand kan haar reghelp nie.  Sy kom staan eenvoudig voor my en herhaal die woord oor en oor, julle weet, ek moet nou regkom.  Maar nou ja, not my circus, not my monkey.  Eers het ek probeer om haar met lesse van die internet af op datum te hou met skoolwerk.  Maar o wee. Telkens moes ek hoor dat sy in die A class (a la Amêrica) is en dus nie hoef “home schooling” te doen nie.

So, nou het ek soos ‘n kind besluit my duur data kan dan maar net sowel vir my eie doel gebruik word nie om ‘n slim kind op datum te probeer hou nie.

Sowat van sonde soek, het ek nie gesoek nie. Maar Homer het blykbaar gedink ek het dit nodig.

Gedagte van die dag: Amper tyd om in die tuin te vroetel. Dalk sal prinsês Ahmêrikah floreer met die hark of vurk.

Julie 28, 2020 at 12:02 nm 14 Kommentaar

Is dit nodig?

Al meer en meer hoor ek “Ek werk van die huis af.” Aan die eenkant baie gerusstellend.  Aan die ander kant … Is kantoorgeboue dan nog enigsins nodig?  Ek wonder nogal baie hieroor.

 

 

Maar nou ja.  Almal wat my deesdae bel of whatsapp, wil weet “Wat doen julle?” Dan vertel ek en soos courtesy nou maar vereis sal ek vra “Wat doen julle?” Feitlik sonder uitsondering is die antwoord “Ons maak huis skoon.” Laat my wonder of hulle huise dan regtig so vuil is.  Genade tog.  Is dit dalk om my saggies te laat insien dat my huis vuil is?  Is dit die geval, dan gaan ek hulle ‘n skenking maak.  Ek sal Homer vir hulle gee.  Gratis en mahala.

Dan kan hulle heeldag agter hom aan loop en skoon maak.  Ek wil hom in ‘n inrigting laat opneem dat hulle hom kan ” house train.”  So morsig kan geen mens wees nie.

Gedagte van die dag:  Is my seuns “house trained?”

April 7, 2020 at 5:13 nm 2 Kommentaar

Telebevarkers.

Kyk, ek is nie ‘n oggend mens nie.  Ek is veral nie ‘n vroegoggend mens nie. Ek wil teen my eie tempo wakker word.  As ek om die een of ander rede vroeg moet opstaan, vir al die gewone redes, dan doen ek dit.  Dikbek, bot, sal ek my gang gaan.  Maar moet my asseblief nie pla voordat ek gepla wil wees nie.

Soos julle weet, loop ek dikwels deur onder telebevarkers. Maar gewoonlik gee hulle my kans om wakker te word, een of twee bekers tee te drink en ontbyt te eet voordat hulle my pla.  So in die newels van slaap hoor ek my selfoon lui.  “Wat de joos?” Ek soek soek my foon, voel die beker tee wat Homer so teen 8vm moes kom neersit het.  Kry my bril beet, sit op en daar lê my foon waar ek weet ek dit nie sal neersit nie.  Homer het seker weer ‘n teleurstellende ondersoek gehad.  Kry dit beet, antwoord.  “Good day mr Oksle, may I speak to your wife please? WDF? “Speaking” kwaak ek.  Ek hoor vir Homer buite lag. “So sorry ma’am.  I am Dudu Ndluli phoning from “wie se moer se medicals.”

Kyk toe kook my bloed, Ek ken die stem. Sy bel my elke Vrydag en glo my, elke Vrydag het sy ‘n ander naam.  “We want to share our specials with you today!  Isnt that great? tjirp sy in my oor.  Teen die tyd staan Homer al in die kamer. Ek veg hard om pose te hou.  “Indeed” knor ek. Toe rammel sy die hele ou verhaal af van hoe frustrerend dit is as mens siek word en jy moet ‘n hoop geld vir die dokter en mediese dienste uitvurk.  “Dudu / Lexi/ Anisha/ Thandi what ever your name may be, we’ve been through this before.  I’ve been telling you for some months now that I have no intention of buying what you are offering.” Toe moes ek eers asem haal en sy neem haar kans waar.  “But ma’am let me explain what I am offering.”

Not likely my dear dink ek en val in toe sy weer asem haal “I am unemployed.  That means I havent got work so I dont get a salary.  I am too old to get a job and too young to get SASSA” knor ek “so I cannot afford your medical aid.” Slaat my simpel met ‘n blerrie pap snoek.  “But that’s the great thing ma’am.  I am not offering medical aid,  today I am offering you medical insurance.”

Berge val op die …… vrou “If I cant afford medical aid, how on the face of this earth can I afford the ever bigger luxury of medical insurance Dudu / Lexi/ Anisha/ Thandi?” vra ek tussen my tande deur. “But ma’am…” toe is Olga op. “Ma’am se moer!”

Weet julle, sy bel elke week van ‘n Durban nommer en elke week blok ek haar nommer na die gesprek.  Tog, skakel sy volgende week van die selfde nommer af.

Gedagte van die dag:  Dalk sal perde teen volgende week horings hê.

Julie 29, 2019 at 9:33 vm 4 Kommentaar

Op ‘n goeie dag

Julle weet….. Soms kan ek net lag. Ander kere kan ek self die lag bere totdat ek veilig in die Fordjie of op my apostelpêre om die hoek al is. Ander kere moet ek hard probeer om nie my vuis toe te vou en net te swaai nie.

 

My vriendinnne, die kwien se direkte familie en haar huis-genoot kom toe mos Sondag hier aan.  “Gaan jy my help?” vra die genoot. Kyk nou weet ek al wat kom. Die wind het mos weer erg gewaai. Toe ek ja sê kom dit “Lemmetjies uitdruk sodat ek lime pickles kan maak?” Kyk dis nou al jare dat ek help.  Ek kry altyd die uitdruk werk.  Dis glad nie lekker nie.  Daardie sous brand my vingers gaar.  Maar daardie piekels is vrek lekker en nee, sy gee haar resepte vir gn mens nie.

Maandag is hulle weer hier met die sak lemmetjies.  Kyk, die wind het ‘n rekord oes bymekaar gebring.  Party is so groot soos ertjies, ander soos druiwe en dan is daar ‘n paar so groot soos golfballe.  Weet julle hoe moeilik melk jy die kleintjies? Ek het nie ‘n gemaklike elektriese masjien nie, ek sal met die hand moet druk. Dinsdag en Woensdag druk ek en druk en druk.  Ry vanmiddag om die bak sap te gaan aflewer.  What do you know?  “Nee” seg sy, “Dis joune.” Ek het al die sap wat ek nodig het.  Toe moes ek weer op my tande byt.  Wat de dinges gaan ek met om en by twee liter skoon lemmetjie sap maak?

Tuis gekom, het ek my resepte boek en kry gou die suurlemoen konsentraat resep.  Kook dit en dink “Julle donners! Dis al wat julle gaan kry om te drink self in die koue totdat dit klaar is.” Goeie aarde!  Ek het die bottels net nou gebêre.  Toe bel sy my en vra verskoning.  Sy was deurmekaar.  Sy sal die sap môre kom haal.  “Watter sap?” vra ek obsternaat.  Asof ek nie weet nie.  “Die lemmetjiesap wat jy uitgedruk het.” Seg sy.  Toe voel ek al hoe klap my vuis teen haar wetie wat nie.  “Nee wat,” sê ek jy kan dit nie kry nie, dis nou al Lime cordial.  Sal sy wragtig vir my vra “But why the …. did you do that?”

Gedagte van die dag: Gelukkig was dit oor die foon.

Julie 4, 2019 at 10:37 nm 7 Kommentaar

Sissie

Ek het die afgelope verpis tot ‘n regte temperatuur sissie.  Goeiste tyding die vorige plek waar ons gewoon het, het die ryp nog wit gelê in enige skadukol teen 11 vm.  Hier is nie eers meer ryp te sien teen die tyd dat ek smorrens wakker word nie.

Ek besef vandag dat die rede hoekom ek so koud kry, is omdat ek die heel dag sit en niks doen nie. Alles aan my is besig om vas te sit. Ek kan nie roes nie, daarom kan ek dit nou nie roes noem nie.  Nee wat, as ek in nog daardie koue plek gewoon het, sou ek gedink het die locals is mal om dit koue te noem.

Die vergalstelike tiptolle het nou wragtig net gewag dat ek my rug draai, toe vreet hulle my kool, spinasie, blomkool, broccoli en spruitkole dat daar net are oorgebly het.

Ek oorweeg dit beslis om weer ‘n kat te kry, dan sal daardie nare ou tiptolle moet ligloop.  My Lapman, is net so koulik soos ek en Sussietjie is soos ‘n trekker, het ‘n hengse raserige aanloop nodig, wanneer sy nog oppad is na die hoek van die huis, al snorkend en hygend, dan is die tiptolle is in die buurman se okkerneut boom en dan sit die hadida’s op die muur vir ons en lag.  Nou mag ek die werfettertjies mos nie met die windbuks skiet nie en die kettie is my groot vyand.  Ek trek daardie rek terug en laat wiel, dan tref daardie verdonderlike klip my.  Nege uit tien kere teen die voorkop.  Ek dink die ding is getoor.

Gedagte van die dag: Ek gaan heksejag op die tiptolle en hadida’s doen om die hitte uit my koulike bene te verdryf.

Julie 2, 2019 at 10:39 nm 9 Kommentaar

Nog ‘n ai tog.

So ruk gelede hoor ons na donker een aand iemand op straat oor ‘n mikrofoon praat.  Gaan toe uit, maar ai, ek kan mense hoor praat, ongelukkig nie wat hulle sê nie.  Die buurtwag mense vertel toe dis ‘n kennisgewing dat ons voorafbetaalde meter bokse getoets sal word.  Mens brug die goed uit en steel dus krag.  Maar wat, solank ek my neus skoon hou.

Daar was ‘n tydsduur gegee en in daardie tyd, kom hulle nie hier uit nie. Vriendinne kom wel in daardie tyd inloer en vertel hoe het hulle die meter kom nagaan en die knoppie met ‘n pyltjie op, oor en oor en oor gedruk. ‘n Hele paar keer.  Tot watter doel vra ek. Maar hulle weet nie aangesien die dame wat die kontrole kom doen het, gemaak het of sy nie hulle vraag hoor nie.

Twee weke na die afsny datum kom hulle toe hier aan.  Ek hoor hoe Homer met hulle argumenteer omdat dit na die afsny datum is. Maar aangesien hy die munisipaliteit se bakkie ken, laat hy hulle inkom.  Ek het nie ‘n saak wat hulle dink nie, maar ek laat hulle nie alleen nie. Die dame druk toe ook daardie pyltjie asof sy bang is dit gaan haar bespring as sy ophou druk. Ek vra haar ook hoekom sy dit so aanhoudend druk.  Sy ignoreer my ook. Ek onthou haar naam van die kaartjie wat sy gewys het, noem haar naam en vra haar weer hoekom sy daardie knoppie so aanval.  Sy maak glo net seker dat dit gebalanseer is. Ek vra toe of dit balanseer.  Teesinnig sê sy “It seems to be.”

Genade die volgende oomblik wil sy weet of die tv aan is.  In hierdie huis word daar mos maar min tv gekyk.  Daar het sy die meter boks wat seker so 15 x 30cm is beet en sy trek dit soos ‘n prop uit die muur. Oop is die res, elke draad word gegryp en stewig getrek.  Ek dring aan om te weet of sy my boks probeer vandaliseer.  Ag aarde tog.  Nee, dis glo omdat die meter nie meer geseël is nie.  Ek het haar gesê om met haar kollega te gaan praat, hy het dit sowat vier en ‘n halfjaar gelede oop gemaak en sou die seël kom vervang het, maar nooit gekom nie. Maar sy gaan eenvoudig voort om daardie drade te ruk en pluk asof hulle vir haar ‘n korte gegooi het.

Maar nou ja, nadat sy seker was die seëls is nie gebreek omdat ons die drade gebrug het nie, word ons ingelig dat ons ‘n nuwe meterboks moet laat insit wat kan seël aangesien die een beskadig is. Homer vra vir wie se rekening en sy sê die munisipaliteit.

Gaan voort sê ek.  Ah maar ek moet hulle bel as daar so 45 eenhede oor is.  Dan kom sit hulle die nuwe een in wat 5 eenhede op het.En die ander 40 vra ek, nee, dit verloor ons.  Ek het hulle laat wag totdat daar net 5 eenhede oorwas, dit was twee weke na hulle ondersoek.  Teen die tyd dat sy hier aangekom het met die nuwe boksie, was daar nog net 2.3 eenhede oor. Want not, waste not.

Gedagte van die dag: Wonder hoeveel bokse het hulle gevind wat gebrug was.

April 9, 2019 at 11:56 vm 2 Kommentaar

Daardie onbetaalde rekening

Wee julle! Ek het my selfoon nommer seker al 16 jaar. Wat my so grensloos irriteer, is wanneer mense my skakel oor “my” onbetaalde rekening en dan nog met stry en self onbeskof en aggresief raak as ek sê dat die enigste rekening wat ek het, vooruit betaal is. Die ‘n Edgars rekening wat ek net uit gewoonte aanhou.  Die ding kom al sedert 1980 saam met my.

Ewentwel, die persoon vandag vertel my dat sy met Rica geverifieer het dat ek inderdaad die persoon is wat sy soek.  Nou ja, kan ek daarteen stry?  Het haar vertel waarteen moet sy gaan vasvlieg.  Haar ook toestemming gegee om die goedere wat op daardie rekening gekoop was, te kom terug haal.  Sy wou bevestig of my woonadres nou Jan poggenpoelstr in Orlando is.  Ja, gewis sê ek. Kom ek wag vir julle.

Wat die vel van my neus af irriteer is dat hulle nie die gegewens nagaan voordat hulle ‘n rekening open nie.  Maar as daar nie betaal word nie, dan bel hulle gou.  Wil sy vir my sê sy weet nie hoe ‘n inwoner van Orlando oor die telefoon sal klink nie?  Verder nog, is Rica veronderstel om inligting uit te gee?  Dan nogal verkeerde inligting ook.  Dis ook nie die eerste keer dat iemand my vertel hulle het my inligting by Rica gekry nie.  In hierdie geval verkeerde inligting. Die vorige keer het hulle tot my id nommer gehad om ‘n selfoon kontrak aan my af te smeer.

Ek hoop hulle kon lekker hulle beslaglegging in Orlando uitvoer.  Sal hulle leer om uitvreet te wees om hulle goed te verkoop sonder om enige inligting te bevestig.

Gedagte van die dag: Ek hoop hulle was goed geneuk daar in Orlando.

Maart 28, 2019 at 10:10 nm 7 Kommentaar

Mans…. grrrrr

Daar word ek toe mos gekommandeer om Homer se admin te doen.  Dis nie genoeg om ‘n vlieg vir ‘n uur per dag besig te hou nie, maar o, wee. Sy hande het nou eenvoudig rond geword vir enige iets anders as yster.

Gaan kuier ons onlangs in die stad.  Die plek waar ons tuis gegaan het, spog met hek toegang beheer.  Nes by die huis.  Ewentwel, die afstand beheerder word dan nou sommer op my skoot neergesit.  Elke keer as ons aankom hek toe, maak die hek operateur die hek oop.  Mos net ‘n knoppie druk.

Dan kom die bevel “Gee aan die water.” Dan gee ek aan. Ek het al genoeg alleen gereis om te weet ek sou nie eers gestrek het om die bottel water in die hande te kry nie. Skaars tien kilometer verder sal die opdrag weer kom “Gee ‘n sweetie aan.” Dan maak ek eerder of ek slaap ander sal ek wragtig teen 120kph die man uit smyt. Ewentwel ons is toe mos nou in die stad.  Toe word ek mos hek operateur.  Elke dag wil hy mall toe gaan.  Dan daarheen dan daarheen.  Een middag kom ons weer terug en hy stop by die hek en wag.

“Gaan jy nie die hek oopmaak nie?” vra hy terwyl hy reeds met die afstandbeheerder in sy hand sit, wat hy kon optel.  So waarom die &^%$^&*( kan hy nie net die (*&^% rooi knoppie druk nie? “Sien jy die rooi knoppie, Homer?” “Wat daarvan?” vra hy.  “Druk dit.” sê ek vererg.  Hy doen dit en ry deur en weer moet ek herinner “Wag dat die hek toegaan.”toe hy verder ry nadat die hek toe is.

Laat my wonder of mans hulpeloos gebore is of word hulle so?

Gedagte van die dag:  Hulpeloos of net plein hopeloos.

Februarie 21, 2019 at 10:40 nm 9 Kommentaar

Eenskottel gereg

Ek het mos al genoem ek is die luiste mens wat ek ken.  Ewentwel, verlede week sukkel ons weer met internet.  Telkom was mos weer teen die paal op. Maar nou ja, ek het ‘n bed vol lap wat gordyne moet word en met Homer se gesweisery reg voor die venster, is die kanse dat dit binne kort gaan gebeur, maar skraal.

As Homer my deesdae sien, wil hy al weet “Wat eet ons?” Hoekom de vy is dit my saak?  Ek wil nie heeltyd my kombuis vuil hê nie.  Skoon maak is soos vroeg opstaan, vastly overrated, dankie. Maar toe dit so koud was verlede week wil hy weer weet “wat eet ons” Daardie ou drie letter woordjie was op die punt van my tong.  Hoekom moet die kombuis elke dêm dag omgeroei word omdat hy wil eet?  Toe tref dit my.  Daar is ‘n halwe pak “Quick cook samp” in die kas en in die vrieskas is daar twee bakke saggekookte bruinbone.  So kom ek maak Oom en tante sop.  Sop is mos ‘n eenskottel gereg en met ‘n pak hoendernekkies en ‘n strook gerookte ribbebene kan dit nogal ‘n gawe ete maak.

So gesê, so gedaan.  Toe ek die handvol pietersielie in die pot gooi en die plaat afsit was dit net mooi tyd vir ‘n beker teetjies voor die sop in die bakkies gaan val. Dan wag ‘n luilekker aand op die uwe.

 

Goeie geeftag!  Toe ek omdraai, staan altwee wasbakke boeppens met skottelgoed. Die vloer het sommer sulke lang briekmerke op en die kaste staan vol goed.  Nou wie de duiwel het reg agter my rug so kom staan en mors?  As ek die maaifoedie in die hande kry, gaan daar bloed loop.  Maar Homer sweer blou hy was heelmiddag buite.  Volgens hom moes ek die gemors gemaak het.  Maar ek is mos nie betotteld in my blerrie kop nie. Nee.  Wragtig, al was die sop hoe lekker, EK MAAK NIE WEER SOP NIE.

Gedagte van die dag: Ek wil ‘n feetjie met ‘n voorskootjie hê.

September 25, 2018 at 9:22 nm 7 Kommentaar

Die Here is goed.

Vandag is ons roadrun loop dag.  Normaalweg, kom ons bymekaar en ons stap.  Gister kom die een verskoning na die ander.  Een het ‘n belangrike vergadering, die ander een se been is seer.  Ou ekskusie van haar wat ons gewoonlik laat dreig om haar tuis te kom haal. Ander een het iepikonders en ek sê my Orbi trek werk nog.

Genade tog.  Ons hoor al heeldag die lugverkeer.  Al is dit nie besonder winderig nie, is dit steeds Augustus.  Hoë brandindeks en al daardie goed.  Homer is hier weg om ‘n aflewering te doen en toe hy terug kom, vertel hy my die grootste saagmeul in ons omgewing brand.  Die massas betoog, breek en brand alweer.  Kan julle dink wat kon met ons gebeur het as ons gaan stap het?  Ons loop by die meuls se indraaipad verby.

Hoekom moet hulle betoog? Goeie donner die meule maak toe oor hulle geweldadige betogings vroeer vanjaar.  Dit het hulle finansieël geknak.  Wat is so dêm moeilik om te verstaan?  Ek is nie ‘n voorstander van die oorsee ding nie, maar ek hoop en bid my kinders wil ‘n heenkome oorsee gaan soek. Hoe lank gaan hulle tevrede wees om net te breek en brand voordat hulle verder gaan om “land” te kry?  Sulke hebsug is darem wragtig besig om handuit te ruk.

Gedagte van die dag: Dank die Vader vir veiligheid.

Augustus 29, 2018 at 4:13 nm 2 Kommentaar

Older Posts


Onlangse Bydraes

Wie ruik?

website counter