Nuwe waardes

Het julle al gemerk hoe alles kleiner raak in die winkels maar die pryse raak meer? ‘n Plak sjokolade was altyd 100g. Natuurlik het jy die 200g plak ook gekry. Tog om die een of ander rede as mens van ‘n plak sjokolade praat, was dit altyd die 100g wat te sprake was.

Ruk gelede het ek opgemerk dat dit skielik sonder drommegerol 90g geword het. Daar is nog 100g beskikbaar. Maar deesdae moet jy mooi kyk of jy neem die 90g. Het ek gesê 90g? Homer het tuis gekom met twee plakke sjokolade. Ek het regtig lanklaas sjokolade geeet of gekom. Dit was mos lent. Al is lent byna drie weke gelede al oor, het ek nog nie sederdien sjokolade gekoop nie.

Ek het egter dadelik toe ek die plak opneem, agtergekom dat dit nie normaal voel nie. Draai toe maar in die rondte en jou waarlik, dit is net 80g. Ek vind dit nogal verbasend dat sulke veranderinge net so goedmoeds deurgaan. Neem maar ‘n sak hondekos. Vir jare was dit 10kg. Toe ewe skielik word die sak kos baie gou klaar. Toe het ek agter gekom dat dit net 8kg is. Deesdae moet jy ook maar goed kyk, want vir elke 8 kg sak hondekos op die rak, is daar een 7 kg sak ook.

Aartappels was sedert my kinderjare 15 kg sak. Toe skielik word dit net 10 kg en jy het nie eers die keuse of jy die groter of kleiner sak wil koop nie. Die ou sak, die 15 kg een was net nie meer beskikbaar nie. Deesdae is daar ‘n 7 kg sak beskikbaar. Ek wonder hoeveel langer sal die 10 kg sak nog beskikbaar wees.

Kyk maar gerus volgende keer of jou 750 ml bottel drank nie dalk al gekrimp het na net 700 ml nie.

Tog was die prys nooit dienooreenkomstig verlaag nie. Die prys het nog in elk geval gebly as die groter verpakking waaraan ons gewoond was.

Gedagte van die dag: Gun ‘n ander dit wat jy nie het of kan kry nie.

Geniet die lang naweek en bly veilig. As jy oppad laeveld toe is vir die langnaweek, pak gerus jou warm klere in. Jy sal dit nodig kry.