Wittebrood is verby

Ander dag het ek en ‘n vriendin gesels oor kosmaak toe sy my vertel het van die eerste keer dat sy skaapkop gebak het. Dit was blykbaar katatrofies. Sy het nie geweet van die een of ander kliere, ek dink tog sy het gesê die traan-kliere wat sy nie verwyder het nie.

Dit het my toe laat dink aan die eerste keer dat ek vir Homer vla gekook het. Dit was nie die eerste keer dat ek vla gekook het nie. Heng, ek het al dikwels tevore vla gekook. Ewentwel, dit was in die dae voor boksies vla.

Ek het vir hoofgereg gevulde pannekoek en slaai gemaak. Toe sy gunsteling, jellie en vla vir nagereg. (gou hoor wat sê Grieters.) In elk geval, toe ek kom aansit het ek gesien dat hy ‘n groot klont jellie, en blik perskes ingeskep het. Maar geen vla nie. Ek het toe gevra of daar fout met die vla was. Waarop hy geantwoord het dat ek dit tog nie kommersieël moes maak nie. Hoekom nie? het ek verontwaardig gevra terwyl ek die lepel in die geel goed gedruk het. Gesteek het. Gekap het. Dit was dik en hard.

“Wel” het hy gesê, “sou jy dit doen, sal jy wragtig twee jaar harde arbeid daarvoor kry.”

Gedagte van die dag: Gelukkig het die lepel in die vla vasgesit.

Advertisements