Kinders moenie in die water mors nie

Desjare, daar in  die ’70’s, was water al ‘n groot issue. Ek onthou nog die embleem van destyds.  Die vet blou druppel met die groen blare onder dit.  Daar was destyds inkleur kompetisies, teken of ‘n gedig of opstel skryf oor bewaring van water.

Ek ry eendag van Pelgrimsrus af Graskop toe en wragtig, daar is ‘n bord langs die pad met die teken op.  Sedertdien het dit verdwyn.  Dis nou as dit ooit werklik daar was.

Ek het een oggend in 1984 die kraan oopgemaak en daar het net so modderdruppel uitgeval.  Gelukkig het Homer die vorige aand laaste gebad en gerieflikheidshalwe vergeet om die badwater uit te tap.  Want dit sou mos beteken het mnr moet die bad skoonmaak.  toe was daar darem tweedehandse water om die ablusies mee te doen.  Ook sommer om die toilet mee te spoel.  (Hoekom het ‘n man uitskeiding nodig om wakker te word?)

Ewentwel, vir dae lank het die plaaslike hout maatskappye en die munisipaliteit hulle brandweerwaens gebruik om water by die huise uit te deel.  Ek sien nog hoe het Ousus,  met haar lappop op die heup, Mavis en ek langs die pad gestaan met ‘n paar koekblikke en emmers om water uit ‘n brandweerwa te kry.  Dit was nag man.  Toe het Demoina gekom en die droogte se rug gebreek.  Dit is die een gebeurtenis wat my altyd helder voor die gees val wanneer ek mense sien wie ‘n hondedrol met ‘n sterk water straal stukkend spuit.  Dink net hoeveel liters water dit sal neem om die drol te laat disintegreer en in die gras te laat weg raak.  Dan moet jy in gedagte hou, ‘n hond bollie meer as eenkeer per dag.

Ek het vanmiddag eintlik gegiggel toe ek gehoor het mense van ‘n township in Delmas voel vreeslik beledig omdat hulle donkies en donkie karre aangebied was om water na hulle huise aan te ry.  Dis mense van nedersettings wie nie dienslewering betaal nie.  Ek sal nogal wonder of dit nie goedkoper kan wees om water aan te lê as wat die donkiekarre en donkies sal kos nie.  Hoeveel water gaan buitendien nie verlore met die vervoer in emmers en kanne nie?

Ek is regtig dankbaar vir elke druppel water wat ek kry.  Ek besef dat mense in die stede en dorpe dikwels te kampe het met vuil water.  Self water waar insekte en ‘n tipe wurm duidelik indie water waargeneem kon word.  Ons kry suiwer bergwater wat deur geen suiwerings proses gaan nie.  Daar word soms chemikalieë by ons water gevoeg, maar dis regtig selde.  Geen chloorreuk begroet jou as jy ‘n glas Blyde water na jou lippe bring nie.

gedagte van die dag:  Vader, laat ons asseblief altyd water hê.

Geniet die naweek en bly veilig.